Şirkətimiz 1972-ci ildə dövlət nəzdində mühəndislik müəssisəsi kimi fəaliyyətə başlamışdır. 1996-cı ildən isə “Buxar” kimi öz fəaliyyətini davam etdirir.İlk öncə su, qaz, istilik təchizatı sistemlərinin və qazanxanaların montajı ilə məşğul olan şirkətimiz, sonralar xidmət növlərini artıraraq adı çəkilən sistemlərlə yanaşı soyutma və havalandırma sistemlərinin də layihələşdirilməsinə və quraşdırılmasına başlamışdır. Daim inkişafda olan müəssisəmiz dünyanın qabaqcıl şirkətləri ilə əməkdaşlıq edir. Şirkətimiz fəaliyyəti zamanı elmin və texnikanın yeni nailiyyətlərindən istifadə edərək Azərbaycana yeni texnologiyalar, avadanlıqlar gətirir və müştərilərinə yüksək səviyyəli xidmət göstərmək üçün çalışır. Təkcə onu qeyd etmək kifayətdir ki, Azərbaycana istilik nasoslarını gətirərək quraşdıran, qruntun və havanın regenerativ enerjisindən istifadə edən qurğunu birinci dəfə bizim şirkət qurub müvəffəqiyyətlə istifadəyə vermişdir. Bundan əlavə şirkətimiz regenerativ Günəş enerjisindən istifadə edilməsi sahəsində də birincilərdəndir. Məhz buna görədir ki, bizim fəaliyyətimiz daim ali texniki universitetlərin diqqət mərkəzindədir. Azərbaycan Memarlıq İnşaat Unversiteti ilə bağladığımız əməkdaşlıq müqaviləsinə əsasən orada “İstilik, qaz təchizatı və ventilyasiya” ixtisası üzrə təhsil alan tələbələr yay təcrübələrini şirkətimizdə keçirlər. Bundan əlavə həmin Universitetin “İstilik, qaz təchizatı və ventilyasiya” kafedrasının professor-müəllim heyəti bizim şirkətə stajkeçməyə gəlir, yeni avadanlıqlarla tanış olur, praktiki biliklərini artırır, bizim əməkdaşlar üçün isə nəzəri biliklərə həsr edilmiş mühazirələr oxuyurlar. Hazırda 100-ə yaxın professional mühəndis və texniki işçinin çalışdığı Şirkətimiz Azərbaycanda müxtəlif növ böyük və orta ölçülü layihələr həyata keçirmişdir. Bunlara yaşayış binalarını, xəstəxanaları, zavod və fabrikləri, məktəbləri, idman komplekslərini, istixanaları və müxtəlif növ inzibati binaları göstərmək olar.