1996թ-ի վերջում Հայաստանի Հանրապետությունում սկսվեց տեղական ինքնակառավարման համակարգի ձևավորումը: Դրան աջակցելու նպատակով 1997-1999թթ. Քաղաքների կառավարման միջազգային ասոցիացիան (ICMA), ՀՀ կառավարման դպրոցի հետ համատեղ, Հայաստանում իրականացնում էր «Տեղական ֆինանսների կառավարման արդիականացում» ծրագիրը: Ծրագրի մասնակիցներն էին համայնքների ղեկավարների տեղակալներ և ֆինանսական ծառայությունների ղեկավարներ: Ծրագրի նպատակն էր մասնակիցներին ուսուցանել տեղական բյուջետավարման հմտություններ, նրանց հաղորդել համապատասխան գիտելիքներ և ծանոթացնել միջազգային փորձին: Ծրագիրը ունեցավ մեծ հաջողություն, և վերջինիս դասախոսական կազմն ու մասնակիցները, գտնելով, որ տեղական ինքնակառավարման համակարգի կայացման ու զարգացման համար մեծ նշանակություն ունի հասարակական կազմակերպությունների ստեղծումը, 1998թ. սեպտեմբերի 24-ին հրավիրեցին հիմնադիր ժողով և ստեղծեցին «Համայնքների ֆինանսիստների միավորում» հասարակական կազմակերպությունը: Համայնքների ֆինանսիստների միավորումը ՀՀ տեղական ինքնակառավարման համակարգի «մտքի» առանցքային կենտրոններից է՝ զինված գործունեության համար անհրաժեշտ ռեսուրսներով, տեղեկատվական և հաղորդակցության ժամանակակից համակարգերով, համալրված արհեստավարժ փորձագետներով ու մասնագետներով, և լայն ճանաչում ստացած Հայաստանում և արտերկրում: Կազմակերպությունը մասնագիտական բազմակողմանի քննարկումների ու երկխոսության մի հարթակ է տեղական ինքնակառավարման բնագավառում քաղաքականություն ձևավորող և իրականացնող պետական կառավարման մարմինների, տեղական ինքնակառավարման մարմինների, քաղաքացիական հասարակության և մասնավոր հատվածի սուբյեկտների համար՝ ի նպաստ ՀՀ տեղական ինքնակառավարման համակարգի ամրապնդման և զարգացման: