More than a mother مبادرة تطوعية أنشأناها علشان نساعد الامهات في تعليم مهارات العمل الحر، والمشروعات الصغيرة اللي ينفع تقدمها من البيت زي الـ freelancing والـ handmade والتدريب عن بعد. لأن الأم لها دور فعال فى الأسرة، وتطوير المجتمع، والرقى بالمستوى المعيشى لمواجهة الظروف الاقتصادية؛ ويبدأ تأثير دورها اما توصل لنقطة التوازن بين أحلامها وطموحها ودورها المميز كأم فى حياة اطفالها. وهى دي رسالتنا…. الرسالة اللى هنعيش، ونكافح أننا ننشرها فى كل بيت، ونوصل لكل أم؛ ونقولها طموحك لسه له مكان، حياتك كأم عمرها ما هتتعارض مع تحقيق حلمك؛ لانك انتِ قدها وقادرة تحققي المعادله. احنا هنا ليه احنا هنا علشان كل أم اضطرت تسيب أولادها صغيرين فى الحضانه، وتنزل تشتغل؛ لتحقيق أحلامها وطموحاتها، وتساعد جوزها فى تحسين المستوى المعيشي. احنا هنا علشان كل أم قعدت فى البيت، واستغنت عن طموحها؛ لتقوم بدورها ناحية اطفالها؛ علشان كل أم ركنت شهادتها فى الدرج وفقدت شغفها بتحقيق حلمها اللي عاشت عمرها تحلم بيه. احنا هنا علشان الأب اللى شايل كل مصاريف البيت لوحده، وبيواجه ظروف المعيشة الصعبة. احنا هنا علشان المرأة هي نصف المجتمع وهى اللى بتربي النصف الآخر. احنا هنا علشان نرتقي بثقافة المرأة، وتفكيرها اللى هينعكس بشكل مباشر على المجتمع من خلال تربية أطفالها على القيم والاخلاق والرقى. احنا هنا علشان المرأة على مر العصور تمتلك دور هام ومؤثر في عجلة الإنتاج وسريان العمل، ومواجهة الظروف الاقتصادية. احنا هنا من أجل الأسرة ورقى المجتمع لأن المرأة هى حجر الأساس؛ هى اللى بتقوم بدور مؤثر فى تربية وتفكير أبنائها رجال وامهات المستقبل. احنا هنا علشان نساعدك توازني بين حياتك كأم وبين تحقيق طموحك فى العمل؛ احنا هنا علشان انتِ قدها، انتِ قويه، انتِ أم عظيمة، وناجحة فى عملك.