კომპანია „წიგნების თარო“ ქართული ბრენდია, რომელიც საბავშვო და ახალგაზრდულ, შემეცნებით-გასართობ პროექტებს ახორციელებს. კომპანიას ამავე სახელწოდების საავტორო გადაცემა აქვს, რომლის პირველი ფორმატი 2015 წელს შეიქმნა და 2016 წლის 16 იანვარს პირველი არხის ეთერში ჩაეშვა. ამ დრომდე (2021 წელი) გადაცემამ 11 სასკოლო და 7 სტუდენტური სეზონი მოიცვა. „წიგნების თაროს“ დაწყების დღიდან 20-ზე მეტი თაროელი ახალგაზრდა დასაქმდა საზოგადოებრივ მაუწყებელში. დღეს „წიგნების თაროს“ გუნდის უმეტეს ნაწილს სტუდენტები შეადგენენ, ყველა მათგანი „წიგნების თაროს“ ყოფილი მოთამაშეა. ამ დროის განმავლობაში გადაცემას უკვე ჰყავს 600-ზე მეტი მონაწილე. სატელევიზიო შოუს გამარჯვებულებისთვის მთავარი პრიზი კემბრიჯის საზაფხულო სკოლაა, რომელსაც ამ დრომდე, „წიგნების თაროს“ 36 მონაწილე ესტუმრა.